काठमाडौं, १२ चैत — प्रतिनिधिसभाका नवनिर्वाचित सांसदहरूले बिहीबार पद तथा गोपनीयताको शपथ ग्रहण गरेका छन्। सिंहदरबारस्थित संसद्को अस्थायी भवनमा आयोजित कार्यक्रममा उनीहरूले औपचारिक रूपमा आफ्नो जिम्मेवारी सम्हाल्ने प्रक्रिया पूरा गरेका हुन्।
शपथ ग्रहण समारोह प्रतिनिधिसभाका ज्येष्ठ सदस्य अर्जुननरसिंह केसीको नेतृत्वमा सम्पन्न भएको थियो। उनले सबै सांसदलाई संवैधानिक प्रावधानअनुसार पद तथा गोपनीयताको शपथ दिलाएका थिए।
संसद् सचिवालयका अनुसार यसपटक ६३ जना सांसदले नेपाली बाहेक आफ्नै मातृभाषामा शपथ लिएका छन्, जसले नेपालको भाषिक विविधता झल्काएको छ। सांसदहरू आ–आफ्नो सांस्कृतिक पहिचान झल्किने भेषभूषामा उपस्थित भएका थिए।
नयाँ संसद भवनको निर्माण कार्य अझै पूरा नभएकाले अस्थायी संरचनामै शपथ ग्रहण कार्यक्रम आयोजना गरिएको हो। स्थायी भवन तयार नभएसम्म यही अस्थायी भवनबाट संसदका बैठकहरू सञ्चालन गरिने जनाइएको छ।