काठमाडौं, १५ चैत — पूर्व ऊर्जा, जलस्रोत तथा सिँचाइमन्त्री दीपक खड्का आइतबार बिहान पक्राउ परेका छन्। गृहमन्त्री सुधन गुरुङका अनुसार खड्काको निवासबाट बरामद भएको रकमसम्बन्धी अनुसन्धानका लागि उनलाई नियन्त्रणमा लिइएको हो।
गृहमन्त्री गुरुङले सामाजिक सञ्जालमार्फत जानकारी दिँदै गत भदौ २४ गते भएको आन्दोलनका क्रममा खड्काको घरबाट भेटिएको नगद रकमको स्रोत र वैधानिकताबारे अनुसन्धान भइरहेको बताएका छन्। सोही अनुसन्धानलाई थप अगाडि बढाउन खड्कालाई पक्राउ गरिएको स्पष्ट गरिएको छ।
उक्त आन्दोलनका क्रममा प्रदर्शनकारीहरूले खड्काको घरमा तोडफोड तथा आगजनी गरेका थिए। आगलागीपछि घरभित्र नेपाली तथा विदेशी मुद्रा जलेको अवस्थामा भेटिएको भिडियो र तस्बिरहरू सार्वजनिक भएका थिए। केही नोटहरू प्रदर्शनकारीले लगेको दाबी गरिएका दृश्यहरू पनि सामाजिक सञ्जालमा फैलिएका थिए।
यस घटनापछि सम्पत्ति शुद्धीकरण अनुसन्धान विभागले उक्त रकमको प्रकृति र स्रोतबारे अनुसन्धान गर्दै आएको छ। विभागले जलेका नोटका अवशेष तथा खरानी संकलन गरेर परीक्षण गरिरहेको जनाएको छ।
पक्राउसँगै खड्कामाथि थप कानुनी प्रक्रिया अघि बढ्ने अपेक्षा गरिएको छ भने अनुसन्धानले महत्वपूर्ण तथ्य उजागर गर्ने विश्वास गरिएको छ।